Robin Şarma – Ferrarisini Satan Monax

İbrahim Niftiyev

Kitabın ingiliscə adı: Robin Sharma – The   Monk Who Sold His Ferrari

Kitabın rusca adı: Робин Шарма – Монах, который продал свой “Феррари”

Kitabın türkcə adı: Robin Sharma – Ferrarisini Satan Bilge

İqtisadiyyat və biznes terminləri ilə danışsam, kitab, real dəyəri nominal dəyərindən qat-qat yüksək olan bir mənbədir və sizin ona invistisiya olaraq qoyacağınız vaxtınız, enerjiniz və yeri gəlsə sağlamlğınız sizə artıqlaması ilə geri qayıdacaq. İndiysə keçək qeyri-iqtisadi terminlərlə kitabın təhlilinə: Dünyanın bir çox ölkələrində (18 ölkədə 15 dildə) bestseller olmuş və ən əsası isə bu ada həqiqətən də layiq olmuş, «Ferrarisini Satan Monax», 50 yaşlarında və çox uğurlu karyeraya sahib, ruhi böhran yaşamış Culian Mentalın həyat hekayəsini bizə anladır. Qədim mədəniyyəti mənimsəməyi onu xilsa edir: o bizi öyrədən müdrik və gerçək biliklər əldə edir:

1) müsbət düşünmək

2) istədiklərimiz çərçivəsində yaşamaq

3) şüurumuzun gücünü başa düşüb, qorxusuzlaşmaq

4) bizim ən dəyərli sərvətimiz olan vaxtımızı qorumaq

5) digər insanlarla olan münasibətlərimizin qayğısına qalamaq

6) həqiqətən yaşamaq

Qısaca Robin Şarma şəxsiyyəti haqqında:

Şimali Amerikanın və dünyanın şəxsiyyətin inkişafı, motivasiya və liderlik sahəsi üzrə ən tanınmış siması, Robin Şarma, 1965-ci ildə Yeni Şotlandiya, Kanadada anadan olmuşdur. Hüquq sahəsi üzrə doktorluq dərəcəsi alsa da, maddi yetərsizlikdən dolayı təhsilinə davam edə bilməmişdir. Buna baxmayarq o, dünyanın, şərq müdrikliyi və qərb texnologiyası və çalışqanlığı ilə sintezini yaradaraq dünyaya təqdim edən nadir insanlardan birisinə çevrilmişdir. Onun çıxışları «USA Today», «National Post» və «The Globe and mail» kimi bir çox nüfuzlu dünya KİV-lərində yer almışdır. Yazıçının «Sən öləndə kim ağlayacaq?», «Superhəyat! 30 günlük həqiqi həyata səyahət», «Titulsuz Lider» və «Ferrarisini Satan Monax» kimi dünyaca məşhur kitabları var. Ən sevdiyi kitab: Paulo Keolyo – Kimyəgardir. Triatlon və Taekvondo kimi idman növləri ilə məşğul olur. Dağ turizmini çox sevir. “Robin Şarma Uşaq Fondu” kasıb ailələrin uşaqlarına təhsil almaları üçün yardımlar edir

Təəssüratlarım:

Olduqca həvəslə və maraqla oxuduğum bu kitab mənə əvvəllər də oxuduğum, öyrəndiyim motivasiyaedici və pozitivləşdirici bilgiləri praktiki olaraq izah etdi. Belə ki, qızıl gülün ürəyi meditasiyası haqqında eşitsəm də ətraflı icra olunması haqqında bu kitabdan öyrəndim. Müsbət vərdişlərin yaradılması üçün nevro-psixi əlaqələrin yaradılması üçün 21 günün lazım olduğunu və ağlın treyninqi haqqında dolğun məlumatlar oxudum. Vizualizasiya və neqativ fikilərin dərhal müsbətlə əvəzləşdirilməsini tam mənasıyla başa düşdüm. Kitabın fərqləndirici cəhəti onun süjetinin pritça formasında olmasıdır.

Bilirsiz, kapitalizm mühitində hər şey rəqabətə dayalıdır (bunu çətin ki, məndən yaxşı bilən olsun. Bu mövzuya diplom işi yazıram). Digər fərdlərlə rəqabət o vaxt effektli olur ki, insan öz-özüylə olan rəqabətdə qalib gələ bilsin. Bunun üçün biz özümüzü daxildən, mənəvi müstəvidə inkişaf etdirməliyik. Bunun üçün kitablar, bu işlə məşğul olan insanlar çoxdur. Vaxt keçdikcə onlara olan inam azalır. Bunun əksinə olaraq isə vaxt keçdikcə insanın motivasiyaya olan ehtiyacı artır. Gündəlik, tipik həyat tərzi isə əsla bizə motivasiya vermir. Odur ki, belə kitabların olmağına müsbət baxıram. Bir çox qayda-qanun  öyrədən kitablardan maraqlı və yadda qalıcıdır. Hətta yeri gəlsə onu da deyim ki, bu kitabı indiyə qədər oxuduğum şəxsi inkişaf kitablarıyla eyni yerə heç vaxt qoymaram.

Kitabın adı niyə belədir deyə sual versəz, mən də istəməzdim ki, yazım spoyler olsun. Odur ki, kitabın adının hər bir sözünü simvol olaraq başa düşün. Bir az düşünün. Kitabın adı özünü doğruldur. Kitabın formatı, yəni üslubu hər şeyə dəyər.

Tənqidlərim:

Buna baxmayaraq kitaba  bəzi tənqidlərim də var. Bu tənqidlər əsasən kitabın texniki yönlərinə aiddir:

1) Kitabın baş obrazının adı Culiandır, Robin deyil. Robin, yəni yazıçının öz adı olsaydı daha yaxşı olardı. Çünki Culian elə yazıçının özüdür. Hər halda yazıçı belə yazmağı məqbul görüb. Robin olsaydı, düşünürəm ki, daha səmimi mühit yaranardı.

2) Çox şey yazmayacam ki, süjeti açıb ağartmayım, odur ki, kitabda bir məqamda düşünürəm ki, təbiət qanunları pozulub və mən belə şeyləri sevmirəm.

3) Üçüncü pretenziyam yazıçıya yox, tərcüməçiyədir. Belə ki, bəzi sözlər ruscaya yanlış tərcümə edilmişdir. Daha doğrusu, yanlış da deyil, oxşar, amma yenə də tərcüməçi özünü çox əziyyətə verməyib. Ya da təcrübə cəhətdən kasaddır. Nadir hallarda rus dilinə olan tərcümələrdə narahatçılığım olur.

Mənim belə kitablar cəhətdən təcrübəm çoxdur. Kitabı çox maraqlı və dəyərli hesab edirəm. Buna baxmayaraq bəzi məqamlarda, adamın üzünə saxta gülümsəmə göstərən və müsbət düşüncəninin nə olduğunu bilmədən onun haqqında danışan, menecerlər və kiçik və orta biznes sahibləri üçün keçirilən tipik Amerikan seminarında olduğumu hiss etdim. Məni bir az təəssüfləndirən bir digər məqamsa ondan ibarətdir ki, kitabın əvvəlində oxucunun emosional şkalası maksimuma çıxsa da, sonra anidən və intensiv olaraq aşağı düşür. Yenə də onu deyim ki, kitab bir çox şəxsi inkişaf kitabarından irəlidir. Başqa sözlə, yuxudan tez oyanmaq, müsbət düşünmək, idman etmək, sağlam qidalanmaq və kayzen fəlsəfəsini xüsusi hətta çox xüsusi formada öyrənmək və mənimsəmək hələ heç kimə bir pislik etməyib. Kitabın üstün cəhətidir ki, bütün bu sadaladıqlarımı sadə və praktik dillə izah edir. Oxuyub və iradə göstərib uğur qazana bilməyənlərə, el arasında tənbəl deyirlər.

Yekun nəticə və məsləhətlərim: 

Hər şey yenə də əlbəttə ki, insanın özündən aslıdır. İradə və idarə. Şəxsi inkişafını oxuyaraq təmin etmək istəyənlər və mütəmmadi motivasiya vasitəsi yaratmaq istəyənlərə, təminatla məsləhət görəcəyim bir kitab. Ola bilər ki, bu yazını oxuyan əziz oxucu da mənim və minlərlə digər insan kimi çoxlu planları olan, amma onları reallaşdırmaq üçün iradəsi olmayan, özünü nizam intizama sala bilməyənlərdəndir. İndiki zamanda çox şey insanın nizam-intizamından aslıdır.

Sovet İttifaqının vaxtında 18 yaşına çatmış hər bir insan gələcək həyatı haqqında bu günkü 18 yaşlı insan kimi qayğılı deyildi. O zamanda fəhlə olmaq ayıb deyildi. Vətəndaş bilirdi ki, 3 ya da 5 ilə dövlət ona pulsuz ev verəcək. Vətəndaş bilirdi ki, lap aşağılarda da olsa (bu günün müqayisə meyarı ilə) işi olacaq və ona heç kim artıq əskik heç nə deyə bilməz. Canla başla çalışsa irəli gedə biləcək, özbaşınalıq yoxdur. İndi isə qayğıkeşlik valideynlərimizdən bizə artıq 10-13 yaşlarında miras qalır və biz artıq gəncliyimizdən başlayaraq qayğılı həyat yaşamağa başlayırıq. Sabahımıza olan inamımız və ümidimiz çox həssaslaşıb. Uzun sözün qısası, kitabda uğurlu, sağlam (Sovetin vaxtında beynimiz qayğının tünd zəhəri ilə zəhərlənmədiyindən xəstəliklər də bu günkü kimi kütləvi və cavan deyildi) və harmonik həyatın resepti var.

P.S. Kitabdan sitatlar gətirmədim. Çünki sitat gətirmək istəsəm gərək bütün kitabı yazam 🙂

mm
Hər yayımda təqdim olunan mövzu başlıqlarında müəllifi olduğunuz və ya tərcümə etdiyiniz məqalələri bizim veb-səhifəmizdə yayımlıya bilərsiniz.
Sosial Media da Paylaşaq